Чăваш Республикин вĕренÿ институчĕ И.Я. Яковлев ячĕллĕ Чăваш патшалăх педагогика университечĕпе, Чăваш наци конгресĕпе тата Шупашкар хулин 62-мĕш шкулĕпе пĕрле Г.Н. Волков академика сума суса кашни çул «Хавхалану» конкурс фестиваль ирттерет. Кăçал вăл чăваш учёнăйĕ Геннадий Волков çуралнăранпа 97 çул çитнине халалласа темиçе номинаципе иртрĕ. Вĕсенчен пĕри паллă этнопедагогăн «Г.Н. Волков хайлавĕсене сцена çинче чи лайăх лартни» номинаци пулчĕ.

Театр ăсталăхне туптакансем пултарулăх ăмăртăвне инçе çулран хăрамасăр республикăн тĕрлĕ кĕтесĕнчен килнĕ: Патăрьел, Елчĕк, Тăвай, Элĕк, Муркаш муниципалитет округĕсенчен – пурĕ 12 пултарулăх ушкăнĕ.

Пултарулăх ăмăртăвĕ хĕрӳ иртрĕ. Ăмăртăва хутшăннă кашни шкул Волков калавĕсене сцена çинче кăтартма лайăх хатĕрленнĕ. Шкул ачисем хайлав сăнарĕсене выляса вĕсем мĕнлерех çынна пĕтĕмлетнине кăтартрĕç. Жюри ачасен калаçăвне, вылянине сăнаса вĕсен сăнар калăплас ăсталăхне хакларĕ.
Куракансем те, хутшăнакансем те уявпа кăмăллă пулчĕç. Çитĕнекен ăру Г.Н. Волков çырнă калаври сăмахсене ăша хывасса шанса тăратпăр.

Çак ăмăртăвăн «Г.Н.Волков хайлавĕсене сцена çинче чи лайăх лартни» номинацире пирĕн Турай шкулĕнчи «Хунав» ушкăнĕ «Ăслă ача» сценка лартса 1-мĕш вырăн йышăнма пултарчĕ. 

4- мĕш класри Иванов Максим «Чи лайăх ар ролĕ» номинацире 1-мĕш  пулчĕ. 

Ертÿçине тата «Хунав» ушкăнри ачасене саламлатпăр. Малашне те маттур чăваш ачисем пулччăр, атте-анне чĕлхине ан манччăр. Инсценировка валли чăваш кĕпе-йĕмĕ, тумтирĕ тупса панăшăн ашшĕ-амшĕсене питĕ пысăк тав.

Петрова О.М.

Кашни инсценировкăрах – пурнăç урокĕ