Ака уйăхĕн 8-мĕшĕнче Муркаш муниципалитет округĕн А.Г.Николаев ячĕллĕ Калайкасси шкулĕнче Иван Яковлевич Яковлев çуралнăранпа 175 çул çитнине, Раççей Федерацийĕнчи Вĕрентекенпе ăс паракан çулталăкне тата Чăваш республикинчи Телейлĕ ачалăх çулталăкне  халалланă «Чăваш ачи чăвашах» республика шайĕнчи 7-мĕш фестиваль иртрĕ. Çак ăмăртăва Турай шкулĕн хастар вĕренекенĕсем, вĕрентекенĕсем тата ашшĕ-амăшĕсем хутшăнма кăмăл турĕç. Кĕçĕн классенче вĕренекен ачасем «Савăнатăп эп чăваш пулнишĕн» ăмăртăва хутшăнчĕç, «Ылтăн хапха» вăйă кăтартса пачĕç, иккĕмĕш вырăн çĕнсе илчĕç. 7-8 классенче вĕренекен ачасем «Сар каччăпа сарă хĕр» ăмăртăва хутшăнса чăваш халăх историне,культурине, чĕлхине, йăла-йĕркине пĕлнине ăс-тăн вăййинче кăтартрĕç, виççĕмĕш вырăна тивĕçлĕ пулчĕç. Семенова А.Н. « И.Я.Яковлев çулĕпе эпир те утатпăр» çавра сĕтеле хутшăнчĕ, «Чăвашлăха упраса хăварасчĕ» темăпа тухса калаçрĕ. Фестиваль тухăçлă та çÿллĕ шайра иртрĕ, пурин кăмăлне те кайрĕ.

Семенова А.Н.